Committee Reports > List of Committees > Dáil > 1952 > Committee on Procedure and Privileges > Report - Assault Committed by a Member on another Member in the Oireachtas Restaurant on 31 January 1952

TUARASCAIL

1. Ar iarratas an Chinn Chomhairle, tá an Coiste um Nós Imeachta agus Pribhléidí tar éis an gearán pribhléide a bhreithniú a rinne an Teachta Seán Ua Coisdealbha sa Dáil an 31ú Eanáir, 1952, i dtaobh ionsaí a líomhnadh a rinne an Teachta Seán Ó Floinn ar an Teachta Oilibhéar Ó Flannagáin i Seomra Bídh Thigh Laighean an lá sin.

2. Tar éis dóibh an Teachta S. Ó Floinn agus an Teachta O. Ó Flannagáin d’agallamh, cinneann an Coiste nach bhfuil aon easaontas tábhachtach eatarthu maidir leis na fíorais i dtaobh an ionsaí, eadhon, gur chuir an Teachta S. Ó Floinn forán ar an Teachta O. Ó Flannagáin sa tSeomra Bídh, mar a raibh an Teachta deiridh sin ag comhrá le Teachta eile, agus gur thug dhá bhuille dhó ar an láthair sin.

3. Dúirt an Teachta S. Ó Floinn leis an gCoiste go ndearna sé an t-ionsaí a tuairiscítear thuas toisc go bhfuair sé amach go ndúirt an Teachta O. Ó Flannagáin, le linn díospóireachta roimhe sin sa Dáil an lá sin nuair nach raibh sé féin i láthair sa Dáil, caint ina thaobh a dtuigfí go coitianta gur easmailt mhór ar a charachtar pearsanta í (Tuairísc Oifigiúil, Iml. 129, Col. 273). Mhothaigh sé nach raibh aon leigheas oiríúnach ar fáil aige, faoi na Buan-Orduithe atá i bhfeidhm, ar chaint den tsórt sin nuair a rinneadh í faoi dhíolúine na pribhléide parlaimintí.

4. An chaint a ghoill ar an Teachta S. Ó Floinn is mar sheach-rá adúirt an Teachta O. Ó Flannagáin í agus, do réir mar mhínigh an Teachta S. Ó Floinn, b’fhacthas dó gur mhasla trom pearsanta air féin, faoi ghné leatagairte, a bhí inti. Níor gairmeadh an Teachta O. Ó Flannagáin chun ordúlachta ag an am toisc—do réir mar a tuigtear don Choiste—nár thuig an Leas-Cheann Comhairle inchialla uile na cainte mar gheall ar a héiginnteacht agus, thairis sin, ba leasc leis í a cháineadh mar dá ndéanadh sé amhlaidh tarraingeofaí aird phoiblí ar an mbrí scanalach d’fhéadfai a bhaint aisti. Shéan an Teachta O. Ó Flannagáin don Choiste go raibh aon bhrí folaigh den tsórt sin ar intinn aige agus dúirt nár bhain an chaint ach le gníomhachta polaitíochta an Teachta S. Ó Floinn.

5. Thug an Coiste dá n-úidh tuarascáil (T. 119) a rinne an Coiste cheana i dtaobh gráscair idir chomhaltaí i maighne na Dála i ndiaidh cainte a caitheadh sa Tigh. An uair sin leagadh síos gur dhísbeagadh ar an Dáil, agus go raibh sé incháinte go ró-mhór, comhaltaí do dhul chun foréigin ag agairt focal a dúrathas sa Tigh. Ag cur an chaighdeáin chomhaontaithe sin i bhfeidhm dóibh sa chás seo, cinneann an Coiste go raibh an Teachta S. Ó Floinn ciontach i ndísbeagadh nuair a ghabh sé chuige féin an ceart chun beart a dhéanamh i ndíol ábhair chasaoide, rud a bhain le ceart leis an Tigh féin. Is ní tromchúiseach, dar leis an gCoiste, dúshlán dá leithéid a thabhairt faoi údarás an Tí ach, ag féachaint dá bhfuil ráite anseo roimhe seo, molann an Coiste go measfaí dísbeagadh an Teachta S. Ó Floinn a bheith cealaithe ar an ócáid seo, ar é d’fháil tathaoire poiblí ón gCathaoir.

6. Níl an Coiste sásta go raibh an Teachta O. Ó Flannagáin gan cion den fhreagarthacht a bheith air sa teagmhas neamhchuíúil seo. Is léir go dtéann dualgas, chomh maith le cearta, le pribhléid na saoirse cainte agus nach cuíúil do chomhalta caint a dhéanamh faoi scáth na pribhléide sin gan smaoineamh ar an drochbhrí d’fhéadfaí a bhaint aistí. Measann an Coiste gur sárú ar ord agus ar ghradam an Tí an chaint a rinne an Teachta O. Ó Flannagáin.

(Sínithe) PÁDRAIG Ó hÓGÁIN,

Cathaoirleach.

28ú Feabhra, 1952.